सिद्धाश्रम शक्ति केन्द्र (Siddhashram Shakti Kendra)

सिद्धाश्रम शक्ति केन्द्र नेपालले ऐतिहासिक जिल्ला गोरखाको गोरख गुफामा नेपालमै पहिलोपटक सवाकरोड अखण्ड गुरु गोरखनाथको मन्त्रजप महाअनुष्ठान सम्पन्न गरेको छ । यस महाअनुष्ठान राष्ट्रगुरु गोरखनाथको प्रथम प्राकट्य स्थलको रुपमा परिचित गोरख गुफामा यही फाल्गुण १८ गते महाशिवरात्रीको दिनबाट शुभारम्भ भई फाल्गुण २१ गतेसम्म संचालन भएको थियो ।
महाशिवरात्रीको बिहानी गणेश पूजन, गुरु पूजन तथा शिव पूजनपश्चात् शुभारम्भ भएको यस महाअनुष्ठान शिव गोरक्ष अर्थात् गुरु गोरखनाथलाई प्रसन्न बनाउने उद्देश्यले आयोजना गरिएको थियो । चौबीसै घण्टा बग्रेल्ती भक्तजनहरु गुरुमन्त्र लेखिएको पहेँलो सल ओढेर गोरखा दरबार परिसरमा रहेको गोरख गुफा, गोरखकाली मन्दिर प्रांगण, पंडित पाटीलगायतका स्थानमा बसेर जपमा सामेल हुनुहुन्थ्यो । ७२ घण्टासम्म अटुटरुपमा चलेको यस कार्यक्रममा निर्धारित संख्याभन्दा पनि बढी मन्त्र जप भएको थियो । यस अवधिमा कुल मन्त्रजप संख्या १ करोड तीस लाख पुगेको थियो । महाशिवरात्रीदेखि नै जाग्राम बसी अखण्डरुपमा गरिएको मन्त्रजपमा दिनरात गरी कसैकसैले त २ लाख सत्तरी हजारको मंत्र संख्यासम्म पनि जप गर्नुभएको थियो । कार्यक्रमको शुभारम्भदेखि समापनको दिनसम्म गुरु गोरखनाथको चरणमा आयोजकको तर्फबाट रोट चढाइएको थियो भने महाशिवरात्रीमा धुनी

जगाइएको थियो । कार्यक्रममा सहभागी हुन काठमाडौँ, भक्तपुर, ललितपुर, पोखरा, चितवन, गोरखा, लमजुङ, पर्सालगायतका जिल्लाहरुबाट सयौँ भक्तजनहरु आउने र जाने क्रम कार्यक्रम अवधिभर नै चलेको थियो । समापनको दिन २१ गते बिहानैबाट गुरु गोरखनाथ तथा गोरखकाली मन्दिरमा पूजा, स्तोत्रपाठ, आरती पश्चात् भजनकीर्तन तथा कृतज्ञता ज्ञापन आदि क्रमहरु रहेका थिए । यसक्रममा गोरखा दरबारका सुरक्षाकर्मी, कर्मचारी तथा कार्यक्रम सफल पार्नलाई सहयोग गर्नुहुने समस्त भक्तजन तथा श्रद्धालुहरुप्रति कृतज्ञता ज्ञापन गरिएको थियो ।
नेपालको एकीकरणको सुत्रपात भएको यस स्थानमा पहिलोपटक यस्तो दिव्य महाअनुष्ठान सम्पन्न गर्न पाउँदा सिद्धाश्रम शक्ति केन्द्र गौरवान्वित भएको छ । श्री श्री महायोगी गुरु गोरखनाथ यस धरतीमा पहिलोपटक प्रकट हुनुभएको स्थानको रुपमा रहेको यस गोरखगुफा आफैँमा दिव्य एवं चैतन्य तपस्थली हो । हरकोहीले यहाँ आएर दिव्यता र चैतन्यताको महसुस गर्न सक्छन् । यस दरबारक्षेत्र वरिपरि विभिन्न देवीदेवताको चैतन्य मठमन्दिरहरुसमेत रहेका छन् । प्राकृतिकरुपमा पनि आफैँमा सुरम्य एवं मनमोहक रहेको गोरखा दरबार क्षेत्र प्राकृतिक छटाहरुले भरिपूर्ण छ ।
स्मरणीय छ, यसै दिव्यस्थलीमा सिद्धाश्रम शक्ति केन्द्रले वैशाखीपूर्णिमाको अवसरमा वार्षिकरुपमा विगत सातवर्षदेखि रोट महोत्सव सम्पन्न गर्दै आइरहेको छ तथा आगामी २०६८ जेठ ३ गतेदेखि १३ गतेसम्म आठौँ रोट महोत्सवको आयोजना गर्ने घोषणा गरेको छ ।
जय गुरुदेव !
Please open the following link to view some photographs of the program.
https://picasaweb.google.com/photosofssk/ShreeGorakshyaMantraJapaMahaAnu...